බැංකොක් නගරයේ පබ් එකක ගින්නකින් 27ක් මරුට

බැංකොක් නුවර පිහිටි පබ් එකක සඳුදා අලුයම හටගත් දරුණු ගින්නකින් පුද්ගලයන් 27 දෙනෙකුට වැඩි පිරිසක් මිය ගොස් ඇත. තායි අගනුවර උතුරු ප්‍රදේශයෙන් මධ්‍යම රාත්‍රියට පමණ වාර්තා වූ මෙම ගින්නත් සමඟ ඝන දුම් රොටු අහසට නැඟුණු අතර, එහි සිටි පාරිභෝගිකයන් දැඩි භීතියට පත්ව පලා යාමට උත්සාහ කළහ.

ගිනි නිවන භටයන් කඩිනමින් ක්‍රියාත්මක වී විනාඩි 30ක් පමණ ඇතුළත ගින්න පාලනය කර ඇත. මුලික වාර්තා අනුව, බොහෝ වින්දිතයන් ගොඩනැගිල්ල තුළ තිබී සොයාගෙන ඇති අතර, ඇතැමෙක් වැසිකිළි තුළ රැකවරණය පතා තිබේ.

තායි අගමැති අනුටින් චාර්න්විරකුල් මහතා සිද්ධිය වූ ස්ථානයට ගොස් මරණ සංඛ්‍යාව තහවුරු කළේය. මෙම මාරාන්තික සිද්ධියට හේතුව සොයා ගැනීමට බලධාරීන් පරීක්ෂණයක් ආරම්භ කර ඇත.